نئی غزل ارشد محمود ارشد

جس  پیڑ  کو  بھی پیار  کی آب و ہوا لگے
وہ موسمِ خزاں میں بھی سب سے ہرا لگے

جینے  کی  آرزو   ہو  اگر  دل میں جاگزیں
تنکے    کا   ڈوبتے   کو    بڑا     آسرا   لگے

مجھ کو مرے نصیب کی ہیں کلفتیں عزیز
'' ایسی  دعا  نہ  دیجئیے  کہ  بد دعا لگے ''

تیور  بتا رہے  ہیں  کہ بگڑی  ہوئی  ہے بات
سورج ، زمیں سے ان دنوں اُلجھا ہوا  لگے

لاؤں گا  جوئے شیر  میں  کیسے  نکال  کر
یہ  میرا مسئلہ ہے تمہیں اس سے کیا  لگے

مجھ  کو  تمہاری  بات  کا  آتا  نہیں یقیں
اے دوست معذرت جو تجھے سچ برا لگے

 دوزخ مرے وجود کا ٹھنڈا ہو  اس طرح
ارشد  اسے کہو  کبھی سینے  سے  آ  لگے

ارشد محمود ارشد